|
TAMAZIΓT
D udem-is kan walit-tt
Ulamma d tameddit
Tinim-d ala tidett
Ma ur telli d tilemzit
Ma ur tecbi tawizett
Ma ur treqq am tergit
Tennam wesser wudem-is
Tzewğem-d anda nniden
Tuγem tiεdawin-is
Tesmegliz s wallen
Tebbehbeh taγect-is
S yimetti fell-awen
Arida d tanubit
D tilemzit n telmezyin
Kra i tečča di teγrit
Deg yifassen nγant tismin
Ar ass-a tif tislit
Ur tecliε di tlawin
AMEDDAKEL
Γur-i yiwen n umeddakel
Am netta ur ufiγ ara
Deg’berdan ma ara nlehhu
Γer tama-w i d-iteddu
Ur iyi-yettixir ara
Deg id mi ara d-neffeγ akken
Nettγummu s yiwen n ubernus
Mi γ-d walan yeεdawen
Qqaren-as wid-ak d atmaten
Am idudan n ufus
Yiwen n wass yekker umennuγ
Nuzzel d imezwura
Anisa i γ-d-kkan yeεdawen
Nqubel-iten am yezmawen
Ur nettwexxir ara
Truh-d tersast s wafug
Ur zriγ γur-i γur-s
Thuza-t-id deg yedmaren
Walaγ-t yeγli γef yedγaγen
Tasa-w tebda fell-as
Yezzel-d afus-is γur-i
Nek la t-ttmuquleγ
Qqim a gma ma d nek hareγ
Ass-a γef tmurt ar k-ğğeγ
Ttar-ik ad t-id-rreγ
Γur-i yiwen n umeddakel
Am netta ur ttafeγ ara
Deg yiberdan asmi i nlehhu
Γer tama-w i d-iteddu
Ur t-tettuγ ara
YIR TARGIT
Mmγin-iyi-d wafriwen
Yiwen n wass ruheγ ufgeγ
Ddiγ akk d yigarfiwen
Nniγ kra ad t-id-rebheγ
Qqleγ d agllid-nnsen
Qqaren-iyi-d ansa ara kkeγ
Ur zriγ zuγreγ-ten
Neγ zuγren-iyi qebleγ
Γer walma anda tmettaten
Yemddukal akken ad ten-ččeγ
Ass-nni ttsuγuγ
Nekki d agarfiw
Mlaleγ-d yiwen n usehhar
Yig akka qqleγ d atarus
Yenna s tit d yinzer zwer
Adar γef tmurt ur yettrus
Af-d kra yellan yeffer
Di tsekkurt alma sibus
Mi dehmeγ kra ad yekker
Ad s-id jemεeγ d amirdus
Adar-iw yezga yezger
Imi-w deg yidammen yettγurus
Akkenni ttsuγuγ
A nekk d atarus
Armi d imi d-dekwaleγ
I d-ukiγ di twaγit-iw
Kra ttarguγ akken tetteγ
Kra sγuγuseγ deg yimi-w
Ziγen deg yifassen-iw ay dermeγ
Ččiγ akk idudan-iw
Yegra-yi-d tura ad cuddeγ
Ma d-hlun yideddicen-iw
Deg ass-a ad ggaleγ ur tteqqleγ
D atarus neγ d agarfiw
Ass-ayi ad suγeγ
A nekkini d ales
A nekkini d amγid
AYEN RIΓ
Ayen riγ mačči d awal
Mi t-d-nniγ yeddem-it wadu
Ayen riγ mačči d uffal
Ansi i s-d-yekka
Ad as-yeknu
Ayen riγ akken i t-urgaγ
Ur t-talasen yifassen
Am yitij mi ara d yessaγ
Ur t-sekdent wallen
Ayen riγ i γer i t-cubaγ
I γer t-cubaγ ur yelli
Yezzi-yaγ-d yegguni-yaγ
Akenni yiwen ur t-yezri
Ayen riγ yiwen i d udem-is
D tidett zeddigen am lekfen
Meεna tidett yeγba yisem-is
Ttaggaden-tt yemdanen
AQCIC D UεEATTAR
Itij yewwed-d γer wemnar
Axxam yeččur d tili
Deg ufrag ibed-d uεettar
Yessutur tin n Rebbi
Mi yeldi imi-s ad yehder
Yeggugem deg wayen yettwali
Tumlilt tettak-d tafat
S tecrad tureqmen ideknan
Tamettut tessenduy taxsayt
Yelli-s tcennu γef ldufan
Aqcic deg wada n tγaladt
La yessisin iniγman
Mi iwala kra n buččamar
Yugad yessawel i yemma-s
“A mmi winna d aεettar.
Ddem-d awren awi-yas”
Mi yewwed γer zdat-s
Yebra i wewren ger yifassen-is
Allen-is uγent am tmes
Mi iwala lherz amgerd-is
Ur yuhtam yettubqes
Lherz yeqqel-d γer yiri-s
Aεettar ancum yerwel
Γer deffir yessegra-d awal
Aqcic aεekkam yuzzel
Ad t-yedfer am uderγal
Armi i t-necrew merriγet
I t-id-nessawed s axxam
Taγect-is zik fessuget
Teqqel am tin yenγa nadam
Tameslayt-is rzaget
D asxertem ur nettwafham
Yeqqim yettebbi deg-nneγ
Iwakken ad ngi akk am netta
“Tasusmi d taγawsa-nneγ
Awi-d kan ad γ-yefk lehna”
I yi-iγaden d weltmas
D gma-s i yellan di dduh
Zriγ ad ten-yekkat yal ass
Ad ten-yehkem meqqer mectuh
Di tura Dadda qqaren-as
Ugadeγ akka ara sen-truh
“Ihi nek ad m-id-iniγ
Ad nεeddi kan ad t-nneγ.”
“Wah ad huddeγ kra i yebniγ
Ula d netta d mmi-tneγ”
IDURAR
Idurar d tidett cebhen
S uqerruy-iw ar cebhen
Ar cebhen amzun d laz
D laz akk i ten-icebbhen
Yeğğuğeg γef yedγaγen
Idγaγen iγef inejtutel
Deg wayen icnan wid i γ-yezwaren
Ar ass-a tidett teffer
Cbaha wwin-tt yedγaγen
Laz yeqqim i yimesdurar
Imesdurar n twaγit
Tawaγit tezzi-yasen
Ala d nettat i ten-ihemmlen
Themmel-iten tettemttat
Temttaten γef ayen ur tetten
Sawlen-asen ad nγen
Tinekriwin n yemγiden
Iγalen mi ara buren
Awi-d win ara ten-yaàen
Ansi i d-yekka waya?
Ayagi yekka-d si tesγart
Tasihrant, tameqrahent
I d-yekren deg uzaγar
Yerzan taxeddimt n udrar
Anwa amesdrar ass-a
I tesserwa tmurt-is?
Ass-ayi:
Taγadt-is d tacabcaqt n uyefki
Asγar-is d lgaz
Tibhirt-is d ssuq
Awi-d kan tadrimt anida-tt?
Tadrimt trebba aqacuc
Di temdinin d izuγar
Izuγar sufella n idurar
Saγayen-tt-id iγallen
Tetten ala at iεebbad
Wid-ak-nni i γ-itetten
Ttfen tamurt di Marikan
Di Rrus d wanda sawden
Tekkan γef wid yettaken iγessan
Idan wid i γ-ihekmen
Ay iγallen akken nella
Nella d wid iburen
Neγ wid n luzinat
Amennuγ i γ-icewlen
Mačči gar-aneγ ara d-yas
Wi γ-yesmesbayen anida-t?
Kkert ad neddukel fell-as
Ad nefrut way gar-aneγ
Ddunit ad tbeddel lsas
Ad d-yali yitij-nneγ
ASIF YEČČA-YI
Wwdeγ s asif sawleγ a yemma
Anda tellid ttxileγ-kem
Susmeγ muqqleγ yal tama
Kra i d-muggrent wallen d ilem
Ah! yemma asif yečča-kem
Γlin-d imettawen ur uhtameγ
Wwteγ deg wudem-iw ccwami
Ur ukiγ mi mderkaleγ
Ula d nek yezzuγer-iyi
Ah! yemma asif yečča-yi
Ahemmal ad iεeddi
I syar imir ara γ-ineγ
Nekni da nemneε d awezγi
Ad ggrin iγessan-nneγ
Ah! yemma asif yečča-yaγ
ADU
Ataya, ataya wadu
Ataya iγil, iγil
Steqsaγ-t anda iteddu
Yenna-d nek yid-s ad nemlil
Wi d keč wi d keč ay adu
Ulamma iles-ik wezzil
Iwehha γer tama n wezru
Yenna nek d win yellan ahlil
Ataya, ataya wadu
Ataya iγil iγil
Ataya, atya wadu
Selt-as ala yetsudu
Ataya, ataya wadu
Ataya asif asif
Steqsaγ-t anda iteddu
Yenna-d abrid-iw γezzif
Win iγer i tedduà la yettru
Yezzuàer-it wasif utlif
Ataya, ataya wadu
Ataya asif asif
ataya ataya wadu
Selt-as la iteddu
Ataya, ataya wadu
Ata yuli-d iγezran
Nezra akk anda iteddu
Abrid-is γer wid yeγran
Win yufa deg-sen yettru
Ad s-d-yessekfel izuran
Ma d wiyid ad sen-d-yesbuhru
Ad sen-yefk azul d ameqran
Ataya, ataya wadu
Ataya yuli-d iγezran
Ataya, ataya wadu
Selt-as la yettsudu
TIZI N WASS-A
Nnbedd γef tizi n wass-a
Nsekked γer deffir
S idelli mi nettherkil
Akken ad nessufeγ Fransa
Γas ma llan arida kra
Wid i tt-yessedragen
Idelli-ines d wass-a
Zdat-nneγ ad t-id-sersen
Mačči d ddin i γ-yewwin
Neγ d tiselbi
Gar izagluyen mačči kan d win
N Fransa iγer nekker ad tt-nezwi
Asekkud n yidelli
Yettwali-d ass-a
D ass ideg nessufeγ Fransa
Ideg d teqqel ssaba ar tmurt
Yekfa laz teqwa tmara
Ufgen ilefdan
Yeγli zzur terrez nmara
Yefsa ujeğğig n tlelli
Tamurt terfed iman-is
Tarwa-s akk teγra
Tesγar di tutlayin-is
Taεrabt n Ldzayer d Tmaziγt
Hudden herqen yexxamen
Nγan-aγ izmawen
Listiεmar bu lemhayen
Yeğğa-d igujilen
Tuğğal d igujilen
Nnbedd γef tizi n wassa
Akken ad nessiked
Seg asmi nessufeγ Fransa
Γer wanida i d-nessawed
I yerwan di tmurt-nneγ
Akken ilaq ass-a
D wid yettruzun tiwwura
Asmi i d-nelha d tirzi-nneγ
Asmi i ncetteh deg yiberdan
Γef alud n yidammen
I yerwan imettawen
N tuğğal d igujilen
Ass-nni bdan ttmerzan
Amek ara γ-ččen
Ass-nni iγunfen
Deg ubrid γef yemmuten achal din
Wid yemmuten thennan
Ass γef i yeγlin
Annuγ-nni ur t-ssinen
Ldzayer-nnsen ufan-tt dihin
D Ldzayer ideg nettwet
Nekni s wid yeddren
Nekni yeqlen d asummet
I wid i γ-yerzan ifadden
Nnbedd γef tizi n wass-a
Nsekked γer zdat
Amek ara yili uzekka
Yezga-yaγ-d umennuγ
Amennuγ nekni ad t-nedhem
Γef yizerfan-nneγ
Kra i γ-yerzan ad t-nessedrem
S yifadden n tdukli-nneγ.
|
